اولاجاق
ظن ائدیردیم او جفا پیشه منه یار اولاجاق
غم گونومده دل بیماریمه غمخوار اولاجاق
مایل اولدوم او قارا گوزلره هئچ بیلمز ایدیم
منی ترک ائیله یه جک مایل اغیار اولاجاق
آتش حسرته یانمیش بو بلادیده کؤنول
عاقبت حلقه ی زولفونده گرفتار اولاجاق
بو یانان بختیم الیندن نه دی چاره م یارب
خواب غفلتدن هاچان بیرده بو بیدار اولاجاق
تا قارا ساچلارینین رایحه سین آلدی کؤنول
بیلدیم آواره ی هر کوچه و بازار اولاجاق
شاعیرم گوزدن آخان یاشیمه طعن ائیله مه یین
بو اوره ک قانلاری بیر گون دور شهوار اولاجاق
((حامدا)) غم یئمه بیر گون گلی او گونده سنین
گوهر اشکینه مینلرجه خریدار اولاجاق